Boneiru Duradero & Kriabon ta kuminsá ku marshe tur siman

For di sèptèmber 2015 Boneiru Duradero den estrecho koperashon ku Kriabon a kuminsá ku un inisiativa nobo. “Marshe di Playa” ta un proyekto piloto di un aña pa un marshe di tur siman den sentro di Kralendijk. E marshe lo ta habrí tur djasabra di 8.00 te 12.00 or riba tereno di Jeugdhuis Jong Bonaire. Dia 18 di yüni próksimo tin un anochi di Informashon i Tayer na Jong Bonaire di 19.00 – 21.30 or.

Meta di Boneiru Duradero ku e proyekto aki ta pa stimulá speshalmente empresa lokal i inisiativa di empresanan chikí dor di krea un merkado. P’esei for di sèptèmber ta ofresé diferente tayer ku prèisnan abou. E tayernan aki ta trata di inovashon di produkto, presentashon di produkto i finansiamentu di inisiativanan di empresa chikí. Kriabon, sosio di e proyekto, ta organisá ya pa añanan kaba,tur luna un marshe di kunukeronan.

Nan a ripará ku algun bendedó ke ofresé nan produktonan tur siman. E produktonan fresku ta daña basta lihé i mester bende esaki relativamente rápido. Kriabon a uni su mes ku e proyekto aki pasobra e tambe ke kumpli ku su bendedónan

E intenshon ta pa krea merkado lokal outéntiko kaminda ta ofresé un variedat di produkto; for di platonan krioyo i kosnan dushi te produktonan arsenal i duradero. E organisadónan ta spera di ofresé un pakete ku ta atraktivo tantu pa e bishitantenan lokal komo pa e turistanan.

Ademas e sosionan ke logra stimulá mas tantu hende lokal posibel pa nan deskubrí nan talento empresarial i pa generá entrada adishonal. Boneiru Duradero i Kriabon ta spera ku e grupo di bendedónan ta forma un bon refleho di nos komunidat multikultural na Boneiru.

 

Anochi di Informashon & Tayer Marshe di Playa

Lugá                : Jeugdhuis Jong Bonaire

Fecha              : 18 di yüni 2015

Ora                  : 19.00 – 21.30 or

Si bo ke ta presente riba 18 di yüni, manda na tempu un mensahe privá via

página di Facebook Boneiru Duradero Portal òf info@boneiruduradero.nl.

Asina nos por garantisá bo un lugá den nos tayernan kompletamente GRATIS. Tambe bo por apliká na Kriabon.

Post navigation