Onnie Emerenciana ta tuma organisashon di Marshe di Playa ofer!!

Entrante 1 di yüli 2016 Onnie Emerenciana a bira ofisialmente e organisadó di Marshe di Playa. E marshe semanal a kuminsá na òktober 2015 komo proyekto piloto di Boneiru Duradero. Meta di e proyekto piloto ta stimulá empoderashon di komunidat dor di apoyá inisiativa empresarial lokal. E proyekto ta finansiá kompletamente pa Wereld Natuur Fonds na Hulanda.

Marshe di Playa a kuminsá aña pasá na tereno di Jeugdhuis Jong Bonaire. Despues di e fase di proyekto piloto e marshe lo mester a bai resultá bou di un forma legal komo fundashon òf koperashon, pero den práktika a resultá ku ta trabahoso pa realisá esaki. Pasobra pa mayoria di e partisipantenan e marshe ta un dushi hòbi banda di nan trabou regular. Sin embargo maneho di un fundashon òf un koperativa ta eksigí reunion den grupo frekuentemente, kordinashon i repartishon di tarea i kòntròl riba ehekushon i finansiamentu. Ta difísil pa kombiná e tareanan èkstra akí ku un trabou. Pa garantisá e kontinuidat di e marshe Boneiru Duradero a disidí di pasa e organisashon den man di Onnie Emerenciana. 

Onnie ta traha ku tur su afan komo boluntario pa Marshe di Playa for di su inisio. Den e tarea akí tur siman e ta responsabel pa harma i desharmá e stèntnan di e marshe. Banda di esaki Onnie mes tambe ta partisipá komo komersiante di bèrdura, fruta, yerba i mata ku e mes a kultivá. E ta un berdadero komersiante di marshe, ningun bishitante di marshe no ta kita bai sin un mata òf un saku di bèrdura!

Boneiru Duradero ta keda sostené e marshe pa un aña mas ku konseho i promoshon pa medio di e página di facebook di e Portal di Boneiru Duradero, te ku momentu ku e inisiativa di komunidat akí por para riba su propio pianan.

Marshe di Playa for di inisio di yüni tin un sitio nobo i ta lokalisá awor kada djasabra riba e tereno di Best Brands enfrente di Warehouse, di 9.00 te ku 13.00 or. Boneiru Duradero ta deseá Onnie i tur e bendedónan na marshe hopi éksito ku e kontinuashon di Marshe di Playa!

Post navigation