Proyekto Piloto di Plèstik ‘Di SHUSHi pa PLAKA’ (“TRASH TO CA$H”)

TREMENDO NOTISIA! Plastic Soup Foundation ta biniendo Boneiru pa yuda nos kombatí un di e problemanan mas grandi di Mundu i Boneiru; e monton kresiendo konstantemente di plèstik.

 

Manera ta konosí, Boneiru ta importá kasi tur su produktonan. E empake di e produktonan akí ta krea un enorme monton di shushi. Tur e shushi akí ta bai nos kuskus, pero no ta tur material di empake tin e mesun efekto dañino pa nos medioambiente. Papel ta dura solamente un luna, karton ta plama di otro den un periodo di masoménos dos luna, bleki ta tuma 50 aña pa deskomponé i plèstik… awèl, plèstik por bai pa semper…

 

Pa e motibu akí nos ta ansioso di presentá nos proyekto piloto di plèstik bou di e nòmber ‘Di SHUSHI pa PLAKA’ (‘TRASH TO CA$H’), ku nos ta bai ehekutá na luna di mei 2016. Den e proyekto piloto akí Selibon ku ta e kompania lokal ku ta manehá asuntu di shushi lo funshoná den koperashon ku Plastic Soup Foundation i Boneiru Duradero pa redusí e monton di plèstik ku ta bai nos kuskus. Meta di esaki ta pa traha produkto ku plèstik resiklá, aki na Boneiru mes. Na fin di 2016 nos lo ta transformando material ku ta benta afó den produkto nobis nobis i útil, splikando pues e nòmber ‘Di SHUSHI pa PLAKA’ (‘TRASH TO CA$H’).

 

Den e próksimo simannan nos lo informá bo tokante e progreso di nos proyekto piloto pues tene nos página di Facebook Boneiru Duradero Portal na bista. I tambe no keda sin tuma parti na nos eksposishon Plastics EXPO ku nos ta bai organisá riba 28 di mei na Plasa Medio Ambiente, di 10 or di mainta pa 3 or di atardi.

 

Si bo ta interesá pa haña mas informashon tokante The Plastic Soup Foundation bai riba www.plasticsoupfoundation.org

Photo by Ronja Jansz

Cash

Post navigation