PROYEKTO PILOTO RESIKLAHE DI PLÈSTIK

Na luna di mei 2016 Plastic Soup Foundation, Selibon i Boneiru Duradero (BD) a start ku un proyekto piloto pa resiklahe di plèstik bou di e nòmber Trashito Cash. Wereld Natuur Fonds di Hulanda a finansiá e proyekto aki. Un dje metanan di e proyekto ta pa realisá un produkshon na eskala chikitu di artíkulonan di plèstik resiklá na Boneiru. Pa esaki a trese for di Hulanda tres mashin simpel pa operá ku kua por resiklá plèstik.

Djaweps dia 6 di òktober último sinku empleado di Selibon a partisipá na un tayer di resiklahe. Durante e tayer aki nan a siña kon, pa medio di diferente téknika, por traha produkto di plèstik resiklá. Hasiendo uso di diferente malchi spesífiko e tres mashinnan aki kada un ta entregá un otro sorto di produkto.

Un di e mashinnan ta produsí un drachi largu di plèstik semi-líkido. Por drai e drachi aki rònt di un opheto, pero por usa e drachi tambe pa yena un malchi chikitu. Ta usa un otro mashin, ku ta un mashin di inyekshon, den kombinashon ku un malchi di metal. Ta spùit e plèstik líkido den e malchi aki. Despues ku e produkto bira duru i fria por sak’é for di e malchi. E mashin di kompreshon ta traha den kombinashon ku un malchi. Ta yena e malchi ku plèstik garná òf mulá ku ta pone den un fòrnu di rotashon. E plèstik ta dirti den e malchi. Despues ku e sustansia aki fria por sak’é for di e malchi.

Pa traha produktonan resiklá por usa tantu plèstik ku kolekshoná komo artíkulonan di plèstik ku ta subi kostanan boneriano. Ámbos sorto di plèstik ta na abundansia na Boneiru. Debí na nan volúmen kresiente nan ta forma problema na Kuskus i na kosta i playanan.

Naturalmente ta asina ku no por prosesá tur plèstik na Boneiru ku e mashinnan chikitu aki. E meta final ta pa yega na Boneiru na produkshon di plèstik garná òf mulá. Por bende e tipo di materia aki riba merkado internashonal, pero tambe por us’é pa produsí produktonan útil na Boneiru mes tambe.

Djasabra dia 22 di òktober públiko ta kordialmente invitá pa presensiá un demonstrashon di e mashinnan aki ku kua ta resiklá plèstik na Plasa Medio Ambiente. Empleadonan di Selibon entre 10’or pa 12’or di mèrdia lo demonstrá kon for di un kliko (kònteiner di sushi) por traha algu di hunga pa mucha.
Pa mas informashon por bishitá e página di facebook di Selibon òf e portal di BoneiruDuradero.

 

Post navigation