Boneiru ta Kla pa Kontrolá Polushon di Saku di Plèstik?

Proyekto lokal ta bisa ku esaki ta mes fásil ku “Bin ku Bo Mes Saku” image1

Un proyekto duradero lokal ta reta ku habitantenan lokal di nos isla ke tuma akshon kontra polushon di saku di plèstik na Boneiru. Anto e proyekto, Boneiru Duradero, ta trahando plan pa hasi esaki mas fásilmente posibel.

Saku di plèstik pa usa un solo biaha a bira un fuente kresiendo i visibel di shushi i polushon.

“Ta asina fásil pa usa saku di plèstik ku ta usa un solo biaha so – nan ta grátis i na abundansia,” Sharon Bol ta bisa, e kordinadó di e proyekto Boneiru Duradero i miembro di direktiva di TeneBoneiruLimpi i Sea Turtle Conservation Bonaire, “Pero ta hopi fásil tambe pa haña alternativa anto nos ta pensa ku bonerianonan ta kla pa esaki.”

En bèrdat, tin indikashon kresiente ku Boneiru a kuminsá kansa di e polushon di plèstik. Un página di Facebook ku yama “Styrofoam Free Bonaire/(Boneiru librá di stairofom” a kuminsá pone sugerensia pa usa baki i saku di kuminda pa bai kuné i ku ta parti ora di kompra na toko i supermerkado. E página ku un habitante lokal a krea na luna di yüli último, rápidamente a haña 350 miembro.

Sinembargo miéntras ku polushon visual ta un problema pa habitantenan, esaki no ta tur kos ku ta preokupá nan. Saku di plèstik ta forma un menasa kresiente pa salú di hende i animal, riba tera i den laman.

Den un periodo di shete dia na ougùstùs último, sambuyadónan preokupá a pone shete reportahe di kantidat grandi di shushi di plèstik ku ta drif den lagunnan i áreanan pegá ku kosta ku tin ref. E sambuyadónan a ekspresá nan frustashon tokante e kantidat di plèstik ku ta drif i e echo ku nan no por a piki tur esakinan.

Pa kombatí shushi di plèstik, algun operadó di sambuyamentu ta organisá aktividat di limpiesa tantu bou di awa komo na playanan ku ta atraé kantidatnan kresiente di sambuyadó kada aña. Den e promé nuebe lunanan di e aña akí voluntarionan di e kompania di sambuyá Dive Friends Bonaire, a rekohé mas ku 30 meter kúbiko di shushi di plèstik.

Un estudio resien ta reportá ku 90% di para di laman a guli plèstik. Turtuga, piská i demas bestia marino tambe ta mira saku di plèstik pa kuminda anto una bes ku guli esaki, e sakunan ta prevení apsorpshon di kuminda ku resultado ku nan ta muri di hamber. E mortonan akí ta redusí e kuminda disponibel pa konsumo humano, i por kousa bahada di kalidat di awa i e medioambiente marino ku ta atraé turismo pa ekonomianan lokal manera esun di Boneiru.

Pa hende, e menasa por presentá ora ku plèstik transparente ta kibra den fragmento mikroskópiko ku ta akumulá den kurpa di piská. Outoridatnan di salubridat humano ta hasi invershon di miónes di dòler pa investigá e menasanan pa salú ora ta konsumí kuminda i awa ku ta kontené kontaminashon di plèstik.

Boneiru Duradero lo enkurashá bendedó i bishitante di su Marshe di Playa nobo pa nan “Bin ku Bo Mes Saku”. E promé Marshe di Playa ta programá pa djasabra 31 di òktober na Jong Bonaire. E marshe semanal lo ta habrí di 8.00 or pa 12.00 or, i lo ofresé produkto di kalidat haltu, produsí lokalmente inkluso bèrdura , fruta i yerba; mata pa hòfi, hoya, paña ku artesania i kuminda krioyo. Manteniendo na e mensahe di redusí uso di plèstik, na e marshe di 31 di òktober lo tin disponibel kuchú, kuchara ku fòrki di plèstik pa usa mas biaha ku por fia i tambe lo parti 200 saku ku por usa mas biaha na e kumpradónan.

Boneiru Duradero i Sea Turtle Conservation Bonaire, a uni forsa pa redusí uso di saku di plèstik ku ta usa pa un solo biaha na Boneiru. Plèstik ta un menasa direkto pa Boneiru su turtuganan i otro bida den laman. E inisiativa pa kolaborashon lo resultá den produsí análisis komparativo, pa mustra e mihó práktikanan pa Boneiru por redusí uso di saku di plèstik. Lo presentá e resultadonan komo konseho na Entidat Públiko Boneiru. Formashon di konsientisashon na nivel lokal ta importante. Públiko mester realisá ku redusí plèstik por ta algu mes simpel ku bai ku bo mes saku ki ora ku bo ta bai kumpra kos.

 

Written by Marlene Robinson

Post navigation